យុវជនបោះជំរំ កំពុងលត់ដំខ្លួន ដោយឡើងហាត់ប្រាណម៉ោង៥ព្រឹក ខណៈអាកាសធាតុចុះត្រជាក់ខ្លាំង
នៅព្រឹកថ្ងៃទី១៧ធ្នូនេះ ប្រតិភូយុវជនបោះជំរំជាសកលលើកទី១០ ឆ្នាំ២០២៤ បាននាំគ្នាឡើងហាត់ប្រាណនៅម៉ោង៥ព្រឹក ជាប់ជើងភ្នំគូលែន ជាមួយនឹងអាកាសធាតុចុះត្រជាក់១៤អង្សាសេ ដែលសកម្ម ភាពឡើងព្រឹកព្រលឹមនេះ ត្រូវបានយុវជន ចាត់ទុកជាសកម្មភាពលត់ដំខ្លួនដ៏សំខាន់។
បញ្ជាក់ប្រាប់ BTV តំណាងយុវជនបោះជំរំ២រូប បានប្រាប់ថា សកម្មភាពឡើងហាត់ប្រាណនេះ ពួកគេ បានក្រោកពីដំណេកតំាងពីម៉ោង៣យប់ ដើម្បីរៀបចំខ្លួនឡើងហាត់ប្រាណនៅម៉ោង៥ព្រឹក ជាមួយនឹងអាកាសធាតុត្រជាក់ក្តៅ។ ពួកគេបន្តថា ពួកគេធ្លាប់តែនៅផ្ទះ ក្រោកពីដំណេកនៅម៉ោង៨ព្រឹក ហើយមានប៉ាម៉ាក់ និងបង បានធ្វើម្ហូបទុកឱ្យហូប ដោយពុំបានធ្វើអ្វីៗទំាងអស់ ប៉ុន្តែនៅពេលមកកម្មវិធីបោះជំរំ គឺអ្វីៗត្រូវផ្លាស់ប្តូរទំាងអស់ មានន័យថា សកម្មភាពនៅក្នុងជំរំ ប្រៀបដូចជាសកម្មភាពលត់ដំ ដ៏សកម្ម ហើយសកម្មភាពទំាងអស់នេះ នឹងធ្វើឱ្យពួកគេ ផ្លាស់ប្តូរទម្លាប់មិនល្អ ទៅជាទម្លាប់ល្អសម្រាប់ ជីវិតពួកគេហើយពួកគេពេញចិត្តដោយសង្ឃឹមថា ពួកគេនឹងមានខ្សែជីវិតល្អ បន្ទាប់ពីពួកគេបានចូលរួម កម្មវិធីបោះជំរំជាសកល លើកទី១០ ឆ្នាំ២០២៤។
សូមបញ្ជាក់ថា កម្មវិធីបោះជំរំយុវជនជាសកលនេះ ជាគំនិតផ្តួចផ្តើមរបស់សម្តេចតេជោ ហ៊ុន សែន អតីតនាយករដ្ឋមន្ត្រី ក្នុងគោលបំណងពង្រឹងយុវជនឱ្យចេះរៀនរស់ជាមួយយុវជនផ្សេងៗទៀត ដែលពុំធ្លាប់ស្គាល់គ្នា ឱ្យចេះសាមគ្គីគ្នា ចេះបង្កើតជាសហគមន៍ និងរស់នៅជាមួយគ្នាដោយសុខសន្តិភាព ពិសេសការរស់នៅជុំគ្នារបស់យុវជន ប្រៀបដូចជាចង្កឹះមួយ គេកាច់បាក់ ចង្កឹះមួយបាច់កាច់មិនបាក់ ក្នុងន័យចេះឱ្យយុវជនចេះសាមគ្គីគ្នាទើបប្រទេសជាតិរឹងមាំ៕