ភ្នំពេញ ៖ សមត្ថកិច្ចខណ្ឌទួលគោក ស្រាវជ្រាវចាប់ឃាត់ខ្លួនជនសង្ស័យបាន២នាក់ ពីបទគំរាមគំហែងថានឹងសម្លាប់ និងបំផ្លិចបំផ្លាញដោយចេតនា ។ ការឃាត់ខ្លួនបានប្រព្រឹត្តទៅកាលពីវេលាម៉ោង២និង៣០នាទីរសៀល ថ្ងៃទី២៧ ខែកក្កដា ឆ្នាំ២០២៣ នៅក្នុងខណ្ឌឫស្សីកែវ រាជធានីភ្នំពេញ ។

ជនសង្ស័យទាំង២នាក់ ទី១ ឈ្មោះ ផល សីវា ហៅ ហៀប ភេទប្រុស អាយុ៣៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួល ផ្លូវបេតុង ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ។ ទី២ ឈ្មោះ ឡុង ឌាំង ហៅ ឌាំង ភេទប្រុស អាយុ៣៣ឆ្នាំ ជនជាតិវៀតណាម មុខរបរ មិនពិតប្រាកដ ស្នាក់នៅបន្ទប់ ជួល ផ្លូវលំ ភូមិ៤ សង្កាត់ច្រាំងចំរះទី១ ខណ្ឌឫស្សីកែវ រាជធានីភ្នំពេញ ។ ចំណែកជនរងគ្រោះ ឈ្មោះ នី ភេទស្រី អាយុ២៨ឆ្នាំ ជនជាតិខ្មែរ មុខរបរ លក់ដូរ ស្នាក់នៅសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។ ខូចខាតសម្ភារៈ បែកកញ្ចក់ទ្វាររថយន្តខាងមុខផ្នែកខាងឆ្វេង និងទ្វារផ្ទះផ្នែកខាងមុខ របស់ជនរងគ្រោះ ។

តាមសមត្ថកិច្ចបានឲ្យដឹងថា កាលពីវេលាម៉ោង៣និង២០នាទីទៀបភ្លឺថ្ងៃទី២៦ ខែកក្កដា ឆា្នំ២០២៣ ជនសង្ស័យទាំង២នាក់បានទៅធ្វើសកម្មភាព វាយបំផ្លិចបំផ្លាញទ្រព្យសម្បត្តិរបស់ជនរងគ្រោះ ហើយគម្រាមសម្លាប់ជនរងគ្រោះទៀត នៅផ្ទះលេខ២២១B ផ្លូវលេខ១៥០ ក្រុមទី២៧ ភូមិ០៩ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។
ក្រោយពីទទួលបានបណ្តឹងជនរងគ្រោះ សមត្ថកិចហចជំនាញខណ្ឌធ្វើការស្រាវជ្រាវ ទីបំផុត នៅវេលាម៉ោង២ និង៣០នាទីរសៀលថ្ងៃទី២៧ ខែកក្កដា ឆ្នាំ២០២៣ ចាប់ខ្លួនបានជនសង្ស័យម្នាក់ នៅចំណុចផ្លូវបេតុង ក្រុម៣ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ និងទៅចាប់ខ្លួនបានម្នាក់ទៀត នៅផ្លូវលំ ភូមិ៤ សង្កាត់ច្រាំងចំរះទី១ ខណ្ឌឫស្សីកែវ រាជធានីភ្នំពេញ ។

ជនសង្ស័យទាំង២នាក់ត្រូវបាននាំខ្លួនទៅសាកសួរនៅផ្នែកជំនាញខណ្ឌទួលគោក ដើម្បីកសាងសំណុំរឿងចាត់ការតាមនីតិវិធី ៕