ភ្នំពេញ៖ ក្រសួង​សាធារណការ និងដឹកជញ្ជូន បានប្រកាសថា ផ្លូវល្បឿនលឿន​​ភ្នំពេញ-ក្រុងព្រះសីហនុ រយៈពេល ៤ខែកន្លងមក គិតពីខែវិច្ឆិកា ឆ្នាំ២០២២ ដល់ខែកុម្ភៈ ឆ្នាំ២០២៣ មានយានយន្តធ្វើចរាចរណ៍លើផ្លូវថ្មីនេះ ជាង ១ ៤១៣ ៩០៦​ដង។ ក្នុង​នោះគ្រោះ​ថ្នាក់​ចរាចរណ៍ ​​មាន ៦២​ករណី។

របាយការណ៍របស់ក្រសួងសាធារណការ និងដឹកជញ្ជូន ក៏បានបង្ហាញថា រយៈពេល ៤ខែនេះ លើផ្លូវល្បឿនលឿន មានអ្នកស្វែងរកជំនួយសង្គ្រោះ ចំនួន ១ ១៥៦ករណី និងសួរព័ត៌មានពិគ្រោះយោបល់ ចំនួន ៥ ០៧៤ករណី​។

យ៉ាងណាក៏ដោយ ក្រសួងសាធារណការ និងដឹកជញ្ជូន មិន​បាន​បញ្ជាក់​ថា ក្នុងចំណោមគ្រោះថ្នាក់ចរាចរណ៍ទាំង ៦២ករណីនោះ មានជនរងគ្រោះស្លា.ប់ ឬរងបួសប៉ុន្មាននាក់ឡើយ។

​ប៉ុន្តែ​ជាបន្តបន្ទាប់កន្លងមក នៅលើផ្លូវល្បឿនលឿន ដែលគេបង្ហោះតាមហ្វេសប៊ុក គេឃើញ​ថា រថយន្តគ្រោះថ្នាក់ចរាចរណ៍​មួយចំនួន ត្រូវឆេះខ្ទេចទាំងស្រុង ខ្លះបុករនាំងចែកទ្រូងផ្លូវ ខ្លះទៀត បើកធ្លាក់ផ្លូវ រថយន្តប៉ះរថយន្តលើគន្លងទិសស្របគ្នា រថយន្តខ្លះទៀត មានលក្ខខណ្ឌបច្ចេកមិនល្អ ដូចជា ខូច បែកកង់ ឬបើកសុខៗ ស្រាប់តែរបូតកង់ ជាដើម។

​ ក្រសួងសាធារណការ និងដឹកជញ្ជូន ក៏បានប្រកាសអំពាវនាវដល់បងប្អូនប្រជាពលរដ្ឋគ្រប់រូប មេត្តាអនុវត្តតាមលក្ខខណ្ឌ ក្នុងការប្រើ​ប្រាស់ផ្លូវល្បឿនលឿន​ភ្នំពេញ-ក្រុងព្រះសីហនុ​ និងសូមគោរពច្បាប់ ស្តីពី ចរាចរណ៍ផ្លូវគោកឱ្យបានខ្ជាប់ខ្ជួន កុំបើកបរលើសល្បឿនកំណត់ ​និងកុំបើកបរបញ្ច្រាសទិសចរាចរណ៍។

ផ្លូវល្បឿនលឿនភ្នំពេញ-ក្រុងព្រះសីហនុ មានចម្ងាយជាង ១៨០គីឡូម៉ែត្រ បែងចែកជា ៣គន្លងទៅ និង ៣គន្លងមក រួមមាន៖ គន្លងផ្លូវ សម្រាប់ចរាចរណ៍ធម្មតា, គន្លងផ្លូវសម្រាប់ជែង, និងគន្លងផ្លូវ សម្រាប់ឈប់បន្ទាន់​។

ផ្លូវល្បឿនលឿនបង់ថ្លៃនេះ ​បានកំណត់ល្បឿនបើកបរ​ ​សម្រាប់រថយន្តគ្រួសារ​ អាចបើកក្នុងល្បឿនលឿនបំផុត ១២០គីឡូម៉ែត្រ/ម៉ោង ខណៈល្បឿនទាបបំផុត ៦០គីឡូម៉ែត្រ/ម៉ោង។ ដោយឡែក សម្រាប់រថយន្តធុនធ្ងន់ មិនមានសណ្តោង អាចបើកបរក្នុងល្បឿន ១០០គីឡូម៉ែត្រ/ម៉ោង និងរថយន្តកុងតឺន័រមានសណ្តោង អាចបើកបរក្នុងល្បឿនត្រឹម ៨០គីឡូម៉ែត្រ/ម៉ោង។

ករណីផ្លូវកោងច្រកចូលចំហៀងទៅផ្លូវល្បឿនលឿន អ្នកបើកបរ ត្រូវបានកំណត់ឱ្យបើកបរត្រឹមតែ 40km/h ប៉ុណ្ណោះ រួចទើបត្រូវបង្កើនល្បឿនដល់ 60km/h។ ដោយឡែកកន្លែង ដែលចាំបាច់ត្រូវបន្ថយល្បឿន ក៏ត្រូវបានដាក់នូវគំនូសរំញ័រ ដើម្បីដាស់តឿនដល់អ្នកបើកបរផងដែរ​៕