ភ្នំពញ៖ ស្រ្តីមានផ្ទៃពោះម្នាក់ ត្រូវបានគេសង្ស័យថា ប្ដីបា.ញ់ចំនួន ២គ្រាប់ បណ្ដាលឲ្យស្លា.ប់បាត់​បង់ជីវិត នៅក្នុងថ្លុកឈាម នៅក្នុងបន្ទប់ឡៅតឿ ក្នុងផ្ទះល្វែងមួយកន្លែង។ បន្ទាប់ពីកើតហេតុ ប្ដីកំណាចនោះ បានរត់គេចខ្លួនបាត់ស្រមោល។

ហេតុការណ៍នោះ បានបង្កឲ្យមានការភ្ញាក់ផ្អើល កាលពីវេលាម៉ោង ៤ និង ៤៥នាទីល្ងាចថ្ងៃទី២ ខែមីនា ឆ្នាំ២០២៣ នៅ​ផ្ទះលេ១៦៨ ផ្លូវលេខKS03 បុរីពិភពថ្មី កួរស្រូវ ៣ ក្នុង​ភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ។

តាមប្រភពពីកន្លែងកើតហេតុ ស្រ្តីរងគ្រោះ ឈ្មោះ ម៉ៃ សុគន្ធា ហៅ អេណា អាយុ ៣៤ឆ្នាំ មុខរបរ​សាឡន មានប្ដី ២នាក់ហើយ។ ប្ដីមុនមានកូន ៤នាក់ និងបានលែងលះគ្នា ១ឆ្នាំមកហើយ។ បន្ទាប់​មក បានយកប្ដីក្រោយ ដែលជាជនសង្ស័យ​ និងឮថា កំពុងមានផ្ទៃពោះ ៤ខែផង។​ ប៉ុន្តែពុំទាន់​ដឹងថា ប្ដីក្រោយនេះ មានសមាសភាព ជាអ្វីនៅឡើយទេ ទើបបានជាមានកាំភ្លើង​ប្រើប្រាស់ ហើយបា.ញ់សម្លា.ប់គាត់បែបនេះ។

ប្រភពដដែល បាននិយាយទៀតថា ប្ដីប្រពន្ធខាងលើ ទើបទៅទិញផ្ទះកើតហេតុនោះ រស់នៅជាង ៣ខែប៉ុណ្ណោះ ហើយនៅមុនពេលមានការភ្ញាក់ផ្អើលនេះ ពុំមាននរណាបានដឹងថា ប្ដីប្រពន្ធនេះ មានទំនាស់គ្នារឿងអ្វី ហើយបា.ញ់សម្លា.ប់ក្នុងពេលណានោះ​ឡើយ។

ប៉ុន្តែអ្នករស់នៅក្នុងបុរីនោះ បានឃើញទ្វារផ្ទះ​កើតហេតុ​​ ចំហរ ហើយដោយខ្លាចមានចោរចូលលួច​ទ្រព្យសម្បត្តិ ទើបរាយការណ៍ ប្រាប់សន្តិសុខយាមបុរី ឲ្យទៅមើល។ ស្រាប់តែប្រទះឃើញស្រ្តី​រងគ្រោះ​ដេកស្លា.ប់ ក្នុងថ្លុកឈាម ដោយមានស្នាម ត្រូវគ្រាប់កាំភ្លើង ២គ្រាប់ ទើបមានការភ្ញាក់​ផ្អើលតែម្ដង។

សន្តិសុខយាមបុរីនោះ បានរាយការណ៍ជូននគរបាលខណ្ឌដង្កោ និងនគរបាលការិយាល័យ​បច្ចេកទេស​វិទ្យាសាស្រ្តនៃស្នងការដ្ឋានរាជធានីភ្នំពេញ បានទៅ​ពិនិត្យកោសល្យវិច័យ និងស្រាវ​ជ្រាវ ដើម្បីចាប់ខ្លួនជនដៃដល់ មកផ្ដន្ទាទោសតាមច្បាប់៕