∼

យោងតាមរបាយការណ៍ លំនៅឋាន១០០ខ្នង ត្រូវបានទឹកជន់លិច និងគ្មានអគ្គិសនីប្រើប្រាស់នៅផ្នែកមួយចំនួននៃទីក្រុង ម៉ុងរ៉េអាល់ (Montreal) ប្រទេសកាណាដា ដែលបានប៉ះពាល់ដល់មនុស្ស១២.០០០នាក់ ក្រោយភ្លៀងធ្លាក់ខ្លាំង។

ភ្លៀងធ្លាក់ខ្លាំងក៏បានបណ្តាលឱ្យមានការលេចធ្លាយទុយយោទឹកនៅស្ថានីយពីររបស់អាកាសយានដ្ឋានអន្តរជាតិ Toronto Pearson ។ អាកាសយានដ្ឋានបាននិយាយថាទឹកស្ថិតនៅក្រោមការគ្រប់គ្រង ហើយការសម្អាតកំពុងបន្ត។

មនុស្សមួយចំនួនត្រូវបានដឹកនាំទៅកាន់កន្លែងសុវត្ថិភាពកាលពីរសៀលថ្ងៃសៅរ៍ ខណៈភ្លៀងធ្លាក់ខ្លាំងបានជន់លិចចំណតរថយន្ត ផ្លូវ និងផ្លូវហាយវេនៅទូទាំងតំបន់ Greater Toronto។

ខណៈអាកាសយានដ្ឋានកំពុងដំណើរការ ខ្លួនបាននិយាយថា ភ្លៀងបានបណ្តាលឱ្យមានការបង្វែរជើងហោះហើរជាច្រើន និងការពន្យារពេលចុះចត។ គិតត្រឹមម៉ោង ១១:១៥នាទីយប់ ជើងហោះហើរជាង ១៤ ភាគរយដែលគ្រោងនឹងមកដល់ និងចេញដំណើរត្រូវបានលុបចោល។

អាកាសយានដ្ឋាន បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គមថា ភ្លៀងធ្លាក់ខ្លាំង និងទឹកជំនន់នេះកំពុងជះឥទ្ធិពលយ៉ាងខ្លាំងដល់អ្នកដំណើរ។ អ្នកធ្វើដំណើរត្រូវបានលើកទឹកចិត្តឱ្យពិនិត្យមើលជាមួយក្រុមហ៊ុនអាកាសចរណ៍របស់ពួកគេមុនពេលចាកចេញទៅកាន់ព្រលានយន្តហោះ៕